Stundum gerast kraftaverkin og þau gerðust í dag, hallelúja! Þær fréttir bárust úr villta norðrinu að við mættum nýta forkaupsréttinn að næsta meistara meistaranna. Þessi skrautskjótti foli er undan Heimsmethafanum Þránni frá Flagbjarnarholti. Móðir hans hefur einnig staðið sig vel í að búa til 1. verðlauna hross og m.a. gefið Íslandsmeistara og svo er hún systir Íslandsmeistara og heimsmeistara. Þetta er klárt að þessi verður meistari í einhverju (spurning hverju) en folinn hefur ýmsa kosti s.s.

• hann er skrautskjóttur, svo misglöggir Limsverjar ættu ekki að vera í vafa í hvaða hesti þeir eiga (þessum skjöldótta)
• hann verður risastór, svo ekki þarf að burðast með mælistöngina í hvert sinn sem hann er sýndur til að athuga hvort hann er orðinn stærri en nýfæddu folöldin.
• hann er mikið töltgengur svo mis gamlir Limsverjar geta átt von á liprum reiðhesti í ellinni.
• hann er talinn bera tvö eistu  en talnagleggri menn en þeir sem keyptu Kolfinn voru fengnir til að staðfesta það.
• fótaburður er eitt af aðalsmerkjum móðurættarinnar svo ekki er ólíklegt að það verði eitthvað úr þessum skrautkálfi.

Eigandinn á því miður mjög fáar myndir af gripnum þar sem hann átti ekki að vera söluvara, en glaseygðir Limsverjar sáu gripinn, tóku myndir og báðu um forkaupsrétt að hætti góðra bisnessmanna. Svo nú er að hrökkva eða stökkva er boðin bárust. Er ekki bara um að gera að minnka jólagjöfina (enn eitt árið) hjá makanum og kaupa í þessum meistara, eða gefa hlut í honum í jólagjöf því ekki þarf að pakka honum inn, hann er nógu skrautlegur fyrir :)

   Áhugasamir hluthafar geta haft samband á limsfelag@gmail.com eða í símanúmerið hjá Helga 698-8370

Þráinn frá Flagbjarnarholti.

Hitti Helga Limlausa í gær. Hann lá ennþá uppí sófa og taldi peninga. “ Þetta er mitt aðal starf fyrir félagið” sagði hann og bætti við “ Ég er búinn að telja þetta fimmhundruð sinnum og fæ aldrei sömu niðurstöðu, þetta vex bara og vex” þegar ég spurði hvot að við ættum ekki að kaupa nýjan fola og halda sigurgöngunni áfram, sagði hann “ Þegiðu Grétar, nú ruglaðist ég einu sinni enn. Þið eruð alltaf að trufla mig með einhverju röfli. Þið hafið ekkert vit á hestum, hvað þá peningum” sagði hann og hvarf svo aftur á vit Mamons á einkanámskeið um peningaþvott í núvitund. Eftir stóð ég eins og staðgreiddur víxill starandi á trúarleiðtoga minn eins og hann væri maðurinn sem fann upp slátrið. Ég legg til að leiðtoginn verði lagður inn, á lokaða bók, meðan ástandið varir.

Kv. Grétar Kirkjulandsgoð