Limsverjar athugið að vorferð og aðalfundur félagsins verður haldin 6. mars n.k

Byrjað verður á aðalfundi og venjulegum aðalfundarstörfum , skýrsla stjórnar

fjármál ofl. Að aðalfundi loknum verður lagt af stað í vorferð og dagskráin verður

fjölbreytt að vanda. m.a. verða Olil og Bergur að Syðri Gegnishólum heimsótt ,Limur verður tekinn út

og komið við á óvæntum stað ef tími leyfir.

Haustferðin var frábær í alla staði og tókst vel og því hvetjum við sem flesta að taka þátt núna.

 

Drög að dagskrá : 

Kl   9:00      Aðalfundur  (reiðhöll Víðidal)

Kl  09:30     Brottför (reiðhöll Víðidal)

Kl:17:00     Heimkoma (reiðhöll Víðidal

 

Þátttökugjald verður svipað og síðast  í kringum kr.4.000 ,ræðst af þátttöku .

(Ath hádegisverður er ekki innifalinn í verðinu).

 

Að þessu sinni verður ferðin farin í samvinnu og samstarfi við Hrossaræktardeild Fáks

og má því búast við góðum hóp og skemmtilegri stemmningu.

 

Minnum á að kvennakvöld Fáks er haldið þetta sama kvöld og tilvalið að flétta það saman og

skella sér á á ball og tjútta vel um kvöldið með hressum og skemmtilegum Fákskonum.

 

Vinsamlega látið vita með mætingu sem allra fyrst í síma 698-8370 eða senda tölvupóst á

fakur@simnet.is fyrir fimmtudaginn  4.mars.

 

 

Með kveðju,

Stjórn Limsfélagsins.

Þar sem það hefur verið óvenju snjólétt í vetur þá hefur þjálfunin á Lim gengið vel, því ekki væri hægt að þjálfa hann mikið ef það væri smá snjór á vegninum nema ryjða braut fyrir hann fyrst og helst setja rauðan dregil. Jóhann tamningarmaður er ánægður með hestinn, segist "vinna mikið með Liminn í hendi" þessa dagana (hmm...eru ekki konur þarna í sveitinni) og gangi þjálfunin bara út á það að Limurinn standi sig sem best þegar og ef hann verður sýndur í kynbótadómi í vor. Ekki er verið að taka Liminn út og sýna hann hverjum sem er, heldur er unnið eftir þjálfunarferli sem mikil leynd hvílir yfir svo að keppinautarnir nái ekki að nýta sér það líka. Þjálfunarferilð nefndist "tvöfaldur júkki með spíral" sem er það sama þjálfunarferli og notað var af handboltalandsliðinu okkar en þeir fengu þetta þjálfunarkerfi lánað hjá okkur og ekki var að spyrja að árangrinum á EM.

Limurinn verður næst sýndur meðlimum í vorferð félagsins þann 6. mars og verður það í síðasta sinn sem hann verður tekinn út áður en sigurhringurinn verður riðinn á kynbótabrautinni.

Limur frá Leiðólfsstöðum slær í gegn !

Hin árlega haustferð Limsfélagsins sem farin var á Laugardag síðastliðin tókst með eindæmum vel og óhætt að segja eigendur og velunnarar Lims frá Leiðólfsstöðum voru í 10.000 fetum eftir heimsóknina til Jóa og Theódóru að Neðra-seli í Landssveit. Limurinn hefur verið þar í frumtamningu síðustu 6 vikurnar og fer svona ljómandi vel af stað og óhætt að segja að þarna er stjarna á ferð. Hafa þau heiðurshjón í Neðra-Seli greinilega sinnt Limnum vel.

 

Dagurinn var í alla staði mjög ánægulegur, byrjað var á heimsókn til Ella og Viðju í Langholti en þangað er alltaf gaman að koma ,margt skoðað og mikið spjallað. Því næst fræddust Limsfélagar um bjór og ölgerð í Brugghúsinu Ölvisholti og það leiddist engum og mikið smakkað.

Næsti viðkomustaður var Helgi Kanslari á Hellu en sárt hungur var farið að gera vart við sig hjá hressum Limsfélögum og snæddu þeir pizzur og hamborgarar af bestu gerð.

Þá var komið að því að hitta heimilisfólkið á Skeiðvöllum og tók þar á móti hópnum léttur og kátur Sigurður Sæmundsson ásamt fríðu föruneyti og aðstaðan hreint út sagt glæsileg.

Limsfélagið þakkar öllum sem gerðu þessa skemmtiferð mögulega og sérstaklega þeim sem

tóku á móti hópnum og gerðu vel við okkur.  Þess vegna getum við ekki látið hjá líða að nefna rausnarlega rmóttökur hjá Limsfélaganum Jónsa og konu hans Gullu sem oft er kennd við Skalla en þau tóku á móti hópnum í glæsilegu sumarhúsi sínu sem gerði  mikla lukku í enda ferðar.  

 

Undir myndaalbúm eru nokkar myndir úr ferðini, eins og sjá má á þessum myndum sem teknar voru á laugardag þá er mikið efni þarna á ferðini og ljóst að gengisvísitala í Limshlutum á eftir að taka mikin kipp á næstu dögum og vikum og ekki er nú félagsskapurinn síðri , Limsfélagar greinilega stuðboltar upp til hópa. 

 

 

Kær kveðja,  

Stjórn Limsfélagsins.   

 

Kæru Limsverjar, þá er stóra stundin runnin upp, Limurinn verður tekinn út laugardaginn 17. okt., því þá verður hin árlega haustferð Limsfélagsins. Stefnan er tekin á Suðurlandið og verða þar áhugaverðir staðir skoðaðir, m.a. tvær heitustu tamningarstöðvarnar heimsóttar sem og skemmtilegir hestamenn. Komið verður við í bjórverksmiðju til að fræðast og smakka íslenskan bjór - veljum íslenskt í kreppunni. Síðan en ekki síst þá verður tekin út tamningin á Lim en hann er búinn að vera í rúmlega mánuð í tamningu.

Lagt verður af stað kl. 11:00 í rútu og komið heim um 18:00. Verð fyrir rútu og bjórverksmiðjuna er ca. 3.500 kr.

Vinsamlega látið vita með mætingu í síma 698-8370 eða senda tölvupóst á fakur@simnet.is fyrir miðvikudaginn 15. okt.

Væntingavísitölur og hagtölur á mörkuðum tóku kipp í morgun því "Mafíosforingjanrir" tveir (Helgi og Garðar) fóru í gærkvöldi og tók út Liminn, þ.e. tamninguna á honum. Limur er búinn að vera í tamningu í heilar 3 vikur og fer hann vel af stað. Svo vel að Helgi falaði hann í smalamennskur í Dölunum, en þó vel væri boðið var ákveðið að láta hann vera á tamningastöðinni áfram næsta mánuðinn. Ef fram fer sem horfir þá er stefnt á að leyfa almenningnum að skoða gripinn í október - áður en honum verður sleppt í hagann.



Foringjunum leist vel á Liminn en þetta er allt spurning um reisingu og stinningu - á gangi. Dundað er í Limnum á hverjum degi og hækkar reisingin og stinningin eykst svo þetta lítur vel út eða eins og kerlingin sagði "Ef Limur verður stinnur og vel reistur þá verð ég ánægð."
Limur er einkar geðgóður og prúður í umgengni og svarar tamningunni vel - svo vel að við fórum fram á afslátt hjá tamningarmanninum en það verður betur rætt seinna undir fjórum bjórum.



Eitt gleymdist þó en við ætluðum að hafa með bikar til að æfa hann fyrir verðlaunaafhendinguna á Landsmótinu - en við gerum það bara næst og fáum Guðna Ágústsson til að æfa það með okkur svo það verði sem raunverulegast. Því ekki má Limur vera okkur til skammar í verðlaunaafhendingunni á Landsmótinu og vera hræddur við glasandi bikara eins og sumir hátt dæmdir stóðhestar hafa orðið.

Viðvörun!!! Ef foringjarnir reyna að kaupa fleiri hluti af ykkur þá er um innherjasvik að ræða því þeir vita meira en almennur hluthafi - svo ekki selja þeim ykkar hlut þó að þeir bjóði gull og græna skóga eða beiti sálfræðitækninni á ykkur.


Það sem okkur þótti einna flottast var hversu flottur taglburður var á Limma - verður sennilega með flottasta taglburðinn á landsmótinu og er það verðmætur eiginleiki í ræktunina.

Nýjar myndir

Sóldís frá Leiðólfsstöðum,systir Lims fór í kynbótadóm á Hellu 20.08.2009 og fékk fjórar níur,þar af eina fyrir vilja og geðslag.
Hæfileika einkunn hennar er 8,31 og aðaleinkunn 8,19

ATHUGIÐ ! ATHUGIÐ!


Limur tekur á móti hryssum n.k.laugardag 20.júní í girðingu við Vetleifsholtsafleggjara í Rangárvallasýslu milli kl:15:00-18:00.
Nánari upplýsingar í síma.698-8370

Í ætt Limsins koma Síða frá Sauðárkróki og Hrafn frá Holtsmúla nokkrum sinnum fyrir.
Notið nú ættfræðikunnáttuna og finnið út hversu oft.



                    

Fyrstu afkvæmi Lims frá Leiðólfsstöðum eru mætt í heiminn.
Jarpskjótt merfolald,undan Kolskör frá Engihlíð og þar með sammæðra Vila frá Engihlíð,keppnishesti Viggu Matt.
Og rauðstjörnótt hestfolald,móðir Perla frá Glæsibæ.
Sjá nýjar myndir

Fyrsta  gleðikvöld Limsfélagsins var haldið sl. föstudagskvöld, þann 1. maí.

Markmið  félagsins er að halda reglulega  slík kvöld sem einkennast skuli af  gleði og jafnvel einnig af söng.

Fór það enda svo  að kvöldið endurspeglaði fölskvalausa gleði Lima yfir augljósum hæfileikum folans og innihaldsríkum umræðum um þá.

Það var svo til að  styrkja enn frekar trúna á folanum að  sýnt var myndband af systur Lims, glæsihryssuna Sóldísi frá Leiðólfsstöðum,  6 vetra gæðingshryssu sem þekktur hrossaræktandi lýsti svo; fasmikil með háar og miklar hreyfingar, mjúk á tölti, skrefmikil á brokki og áreiðanlega alveg sprautuvökur líka. Ljóst var að menn fóru að  stofna til félagsskapar til að fjármagna kaup á merinni.

Það kom einnig í ljós á fundinum  að dæmi eru orðin um að menn hafi verið að  selja  hálfa hluti í Lim til að bjarga fjárhag heimilisins á krepputímum.

Það er ljóst að þetta kvöld lofar góðu um framhaldið og að nokkur skemmtan sé líkleg á komandi gleðikvöldum félagsins.

Næsta gleðikvöld er áformað næsta haust þegar við fögnum hæfileikum Lims að lokinni frumtamningu.

 

Limsfélagar athugið!

Limshátíð verður haldin föstudaginn 1.maí n.k. kl.21:00 í Reiðhöllinni Víðidal