Eigendur stóðhestsins Glyms frá Leiðólfsstöðum afhentu Mæðrastyrksnefnd styrk að upphæð 300 þús. sem kemur eflaust að góðum notum rétt fyrir jólahátíðina. Guðmundur Ólafsson, fyrrverandi fornmaður Fáks, afhenti Mæðrastyrksnefnd styrkinn í dag en þar var í nógu snúast enda jólahátíðin að ganga í garð.

Stóðhesturinn Glymur var seldur til Austurríkis núna í desember eftir að hafa gert góða hluti hér á landi. Forsaga málsins er sú að nokkrir áhugasamir hrossaspegúlantar tóku sig saman og keyptu Glym sem trippi árið 2009,  en þá hét hann Limur frá Leiðólfsstöðum og stofnuðu þeir Limsfélagið sem hafði það markmið að láta gott af sér leiða fyrir félagsmenn (gleðivökvi til að kæta sálina) og aðra (góðgerðarmál). Limsfélagið hefur oft styrkt þarft málefni og mun halda því áfram því aðrir hestar eru komnir til sögunnar sem munu halda merki félagsins á lofti, þó Glymur muni í framtíðinni gleðja hrossaræktendur í Evrópu. 

Það fer það orð af Limsverjum að þeir séu gjafmildastir Íslendinga. Ekki nóg með það að þeir eiginlega gáfu Claudiu Lim, heldur tók stjórnin þá ákvörðun að styrkja líka íslenskt samfélag og ákvað að af hverjum hlut í Lim færi kr. 5.000 til Mæðrastyrksnefndar fyrir jólin.

Þetta er bara dropi í hafið af þeim hagnaði sem Limsverjar hafa haft af klárnum, bæði í formi peninga og svo ekki sé talað um þá vitringa sem höfðu vit á að nota klárinn og eiga skjöldóttan vonarpening í bunkum.  Það er um að gera að láta gott af sér leiða og styrkja þá sem áttu ekki kost á að eignast hlutabréf í klárnum á sínum tíma og fær Mæðrastyrksnefnd því veglegan styrk frá félagsmönnum sem kemur mörgum að góðum notum. Reyndar stóð valið á milli Mæðrastyrksnefndar og annarar góðrar stofnunar sem hefur bjargað mörgum hestamanninum, en sumir vilja meina að eftir síðustu vísindaferðir félagsmanna myndu fleiri njóta góðs af því að styrkja SÁÁ. Stjórnin mun því afhenda Mæðrastyrksnefnd rúmlega 300 þús og hafðið allir þakkir fyrir gjafmildið.

Glymur eða Lymur frá Leiðólfsstöðum eins og hann hét  vorið 2009, er félagið fékk hestinn á þriðja vetur ,var kvaddur laugardaginn  29.nóvember s.l. að sjálfsögðu  mætti hesturinn í Guðmundarstofu ásamt Eysteini Leifssyni hestaútflytjanda en Limur fór út þá nótt.

Limurinn er við það að verða heimsfrægur því samkvæmt Helga yfirlim þá var hann seldur til Claudiu Schiffer, sem er frægt sundfatamódel enda er hún óvenju leggjalöng og barmfögur. Ekki veit ég hvar Helgi komst í samband við hana eða hvort grái fiðringurinn talaði fyrir hann er fréttamaður spurði um nýjan eiganda.  En það er ljóst að Limsi mun flytja til Austurríkis á sunnudaginn og þar verður hann notaður til að kynbæta Austurríska Alpageitastofninn sem trítlar um í Ölpunum og þiggur brauð frá ríkum túristum. Trúlega mun hann einnig sitja fyrir með sundfatamódelinu Claudiu og verður gaman að sjá myndir úr Ölpunum af Claudiu hinni fáklæddu og Limnum vel reistum með Austurrísku Alpana sem bakgrunn.

Þar sem eigi hefur farið betra fé  erlendis (nema greiðslan fyrir hann sem fór inn á reikning á Tortúla eyjum í nafni Helga múrara Schiffer), þá munum við koma saman á laugardaginn og gráta Liminn. Mæting í Guðmundarstofu kl. 17:00 - 19:00 og munu stjórnarmenn verða með myndasýningu af nýjum eiganda og einhver bjór verður á boðstólum til að koma tárakirtlunum af stað. Þeir sem vilja minnast Limsins er bent á ferðasjóð Helga en hann stefnir á að heimsækja Claudiu og Lim um leið og hitnar í veðri svo það sé hægt að vera fáklæddur í útreiðunum. 

Allir velkomnir til að kætast yfir landvinningum okkar í Austurríki og gráta Liminn. Einnig eru menn hvattir til að kaupa jólabókina í ár sem Limsfélagið gefur út, "Limurinn og sundfatamódelið bregða á leik"  og er hún er ríkulega myndskreytt. Einnig fæst hún í bókabúð Playboyfélagsins en Helgi og aðrir stjórnarmenn eru með góðan afslátt þar.