Hrossakjötsveisla Limsverja verður haldin laugardaginn 9. jan. nk. svo við viljum biðja alla að spara við sig í áti yfir hátíðarnar því hrossakjötsveislan er ein magnaðasta átveisla landsins. Nokkrir strigakjaftar munu koma og láta gamminn geysa yfir borðhaldi, verðlaunaveitingar og margt fleira skemmtilegt. Endilega að taka daginn frá og mæta með bros á vör eins og þetta folald.

Það lá við að undirritaður keyrði útaf er hann sá undurfallegt bleikt pardusdýr í hestagirðingu við þjóðveginn. Það var nauðhemlað og vippað sér út eins og útlendingur sem sér fjall til að mynda eða góðan stað til að skíta á, slíkur var hraðinn. Þetta folald bar af í girðingunni og það stillti sér upp aftur til að undirstrika að hann væri KÓNGURINN á svæðinu. Það er ljóst að það verður brunað til bankastjórans á morgun og slegið lán hjá alþjóðlega gjaldeyrissjóðnum (á undan Grikkjum) til að reyna að eignast bleika Pardusinn.

Glaumur frá Geirmundarstöðum mun kynbæta íslenska hrossastofninn í Dölunum í sumar (frá 21. júní). Félagsmenn, sem og aðrir áhugasamir um velferð íslenska gæðingsins, geta komið með hryssur til Glaums en verða fyrst að hafa samband við Helga í síma 698-8370. Folöldin undan Glaum þykja einkar gæðingsleg og segir Helgi að Spunalínan muni bjarga íslenska reiðhestinum og hefja vegferð hans aftur til skýjanna hérlendis sem erlendis. Glaumur og hans dyggu félagsmenn munu því standa með pálmann í höndunum eftir nokkur ár og hlæja að hinum sem ekki höfðu vit á því að nota Glaum.