Eftir handsal  á  sveifluprinsinum Glaumi frá Geirmundarstöðum þurfti  að finna gripnum nýja fósturforeldra, upp kom að heiðurshjónin í Dalbæ í Flóa væru mjög góður kostur. Eftir viku viðdvöl í  Víðidalnum var það úr að folinn var sendur í Dalbæ. Þegar Má var þakkað fyrir uppeldið,heyrðist þá bara hm ha, viljið þið ekki koma austur og líta á folann Var það úr að nokkrir fótafimir karlmenn(Helgi múr,Garðar geð,Siggi Matt)ásamt einum kúski  fóru austur, klárir í  að snara örfrískan gripinn  til  að síðuþukla hann. Þegar Gemsanum var lagt að hólfinu sást úr 30 metra fjarlægð að ekki þurfti að kanna holdarfar folans frekar. Svo stinnur og gljáandi var hann.

Var það samdóma álit sendlanna að betra fóstur væri vart fundið og héldu mjög sáttir í borgina aftur.

HS

Hin árlega hrossakjöts veisla Limsfélagsins og kynbóta nefndar Fáks var haldin laugardaginn 7.jan í félagsheimili Fáks í Víðidal.

Veislan lukkaðist vel undir frábærri handleiðslu Sigga Svavars skemmtanastjóra Limsfélagsins.Góður rómur var gerður að matnum enda vel framreiddur af Jóni Helga og hans frábæra starfsfólki og kunnum við þeim bestu þakkir.
Eftir borðhald verðlaunaði Garðar Sigursteinsson fyrir hönd kynbótanefndar Fáks hæst dæmdu kynbótahross ræktuð af Fáksmönnum í boði Líflands með dyggri aðstoð Guðmundar Birkis Þorkellssonar,sem fór yfir eiginleika og ættir hrossa og eigenda.

Ekki þýddi bara að hampa Fáksverjum,Limsverjar urðu að vera með svo að Siggi verðlaunaði mesta ræktunargúru Limsverja,Hilmar á Skarði og fékk hann stórglæsileg verðlaun fyrir efnilegasta fylið( sjá síðuna frá 14.05.2010). Því næst mætti í salinn heiðursgestur kvöldsins Glymur frá Leiðólfsstöðum ásamt Sigga Matt og Ragga Tomm og voru að sjálfsögðu heiðraðir með jurtum.Næstur á svið var kynntur hinn kyngimagnaði Guðni Ágústsson hestamálaráðherra allra tíma,óhætt er að segja að hann fór hamförum í púltinu, menn sáu fyrir sér, flestir þá á þriðja bauk drauma forseta .Leynigestur kom á vegum Kobba Jóns,Kalli frændi ( Örvarson) eftirherma og tók nokkrar þjóðþekktar fígúrur,að lokum ákváðu forsprakkar Limsfélagsins að gera Kidda Huga og Guðna Ágústsson að hluthöfum númer 61 og 62 í Glaumi frá Geirmundarstöðum og þáðu þeir kumpánar hnossið með glampandi augum verðandi heimsmeistara.
Limsfélagið þakkar öllum þeim sem að lögðu hátíðinni lið,kærar þakkir fyrir frábært kvöld.

-H.S.

p.s.
Nýjar myndir í myndaalbúmi.

Vegna þráðláts oðróms um að uppselt sé á hrossakjötsveislu Limsfélagsins,skal áréttað að enn eru nokkrir miðar óseldir.

Glaumur hafði stutt stopp í bænum til að venja hann við menninguna áður en hann færi austur fyrir fjall og kynntist alvöru sunnlenskri rigningu.  Nokkrar myndir voru teknar af kappanum svo Helgi yfirmúrari gæti prentað þær út svo hann þekkti folann næsta vor. Það er frekar slæmt fyrir svona félagsskap að  hafa svona óhestglöggan umsjónarmann á svona dýrgrip enda er það þess vegna sem hann heldur alltaf undir skjótta stóðhesta sjálfur því þá eru meiri líkur á að hann þekki beljuskjóttu hestana sína sjálfur. Við skulum vona að hann þekki Glaum á stjörnunni (eftir mynd) svo hann komi ekki með eitthvert flókatrippi í staðinn næstar vor er hann verður kynntur í Reiðhöllinni.

Búið að æfa uppstillinguna fyrir kynbótadóm. Glaumur er svo hálslangur að það mun ekki þýða að hafa einhvern venulegan hobbita-kynbótaknapa á honum, þeir myndu ekki sjá hvert þeir væru að fara því reisingin er svo gífurlega J

Við skulum vona að Þáttur gamli í Kirkjubæ komi ekki upp í honum í reið og höfuðburðurinn verði svona!!!

Glaumur lýtur nokkuð vel út miðað við veturgamalt trippi og verður gaman að sjá hvernig hann þroskast næstu árin. Búið er að selja alla 60 hlutina og gekk það mjög vel og nú er bara að vona að hlutabréfavísitalan taki jafn vel við sér og væntingavísitala eigenda en eins og er þá er mikill munur þar á milli, en það stendur til bóta :)

 Yfirhestahaldarinn með pískinn góða, eins gott að halda sig á mottunni.

Glaumur á hágengu tölti - ójárnaður svo það verður aldeilis sveifla á karli er hann kemst á járn í fyllingu tímas.

Glaumur hefur hafið sína heimsreisu og hafði fyrstu viðdvöl í Reykjavík í vikunni. Ekki fékk hann þó að hvíla sig því snarlega var honum kipp út í gerði og látin dansa fyrir stjórnarmeðlimi, bæði á tölti og brokki. Létt er yfir kalli og von til þess að hann þroskist vel í vetur og þá verður haldin stór sýning á honum í vor fyrir alla sem vilja og kannski líka þá sem vilja ekki.
Síðan verður dregið út hverjir fá að nota hann næsta vor en fyrst þarf að redda girðingu fyrir kappan svo ef einhver vill fá afnot þá er gott að redda fyrst girðingu.
Glaumur er strax viljugur, léttur í hreyfingum og hreyfir sig á Hólamátann, þ.e. hvelfdur makki, lækkar sig að aftan og spyrnir sér fram með frjálsar og fimar hreyfingar. Notar aðallega brokk en bregður fyrir sig hýruspori.
Stjórnarmaður var byrjaður að semja vísu um kappann en það vantar að botna hana en ákveðið er að hafa vísusamkeppni og verða bestu vísurnar gefnar út í bók um jólin og þá er jólagjöfinni handa konunni reddað þetta árið.

Tvær leirburðavísur hnutu fram á varir stjórnarmanna í dag en þetta er að sjálfssögðu bara hnoð og það geta örugglega einhverjir gert betur og sent okkur vísur.
 Þessa á eftir að botna

Glaumur verður eigendum sínum mikill gleðigjafi,

enda strax gammvakur lista gæðingur.

Seinna verður hann Sleipnisbikarhafi

???????

 

Eigendur verða þó þyrstir að bíða

en munu háar skýjaborgir smíða,

því fyrst þarf Glaumur að ríða

ljótu merinni þeirra og fyrir það líða.

Þar sem Glymur frá Leiðólfsstöðum stóð sig vel í vor og er núna hæst dæmdi Álfssonurinn í heiminum þá er mikill hugur að fara í útrás og stækka félagið. Þó að félagsmenn hafi verið duglegir við að stækka á þverveginn J þá viljum við frekar stækka félagið með því að kaupa nýtt stóðhestefni og fjölga félögum þar sem mikil ásókn hefur verið í að komast í félagsskapinn. Njósnari hennar hátignar, James Bond Íslands þegar kemur að hestaheiminum, fréttir allt fljótlega þó að í múrverki sé og heyrir frekar dapurlega, þá fór það ekki framhjá honum að verðandi heimsmeistaraefni væri falt. Gerður var leiðangur norður í land þar sem hann fékk hraðskreiðasta sendibílstjórann á svæðinu í lið með sér til að vera á undan öllum hinum sem ætluðu að klófesta heimsmeistarasoninn.  Ekki þótti ráðlegt að yfirgefa Skagafjörðinn nema handsala kaupin og reyna svo að sannfæra þá sem hafa ekki séð hann að annað eins stóðhestefni hafi ekki sést í langan tíma.

Um er að ræða son heimsmeistarans Spuna frá Vesturkoti sem vann hug og hjörtu, já og veski hrossaræktenda enda jaðraði við slagsmálum eftir landsmótið við það að koma hryssum undir hann. Spuni sló í gegn á Landsmótinu enda einkar flinkur alhliða hestur. Móðir Glaums er sýnd en ekki hátt dæmd, um 7.50 en hún var aðeins 3 mánaða taminn þegar hún var sýnd. Hún hefur þegar gefið mjög góðan 1. verðlauna stóðhest, Kokteil frá Geirmundastöðum og hefur hann líka sannað sig á keppnisvellinum, verið í úrslitum á Landsmóti í unglingaflokki og farið vel yfir sjö í tölti. (hér er slóð á myndband af Kokteil  http://www.hofapressan.is/watch_video.php?v=b27fe8656879ce8

Móðir Glaums er undan Hrafnssyninum Boða frá Kjarnholtum en móðir hans er nánskyld Glókollu frá Kjarnholtum. Svo eru hestar  eins og Þáttur 722 frá Kirkjubæ, Leiri 708 frá Reyni og Léttir 600 frá Vík einnig í móðurlegg hennar.

Félagið verður samsett af 60 hlutum til að byrja með og er öllum skemmtilegum hrossaræktaráhugamönnum er gefinn kostur á að vera með til að efla hrossarækt í landinu,,, en fyrstir koma, fyrstir fá.  Þeir sem ætla að verða með í Glaum verða að senda póst á fakur@fakur.is sem fyrst því búast má við því að margir skrái sig strax fyrir hlut og við þurfum að borga hestinn í næstu viku svo allir verða að leggja inn til að tryggja hlutinn sinn. Annars missum við hestinn.

Glaumur er ræktaður af sveiflukónginum Geirmundi Valtýssyni og mun hann koma og halda uppi stuðinu á árshátíðum Glaums þegar hann verður búinn að slá í gegn.

Hér meðfylgjandi eru nokkrar myndir af Glaum en hann er framfallegur, léttbyggður og vel stór. Glaumur er með mjúkan háls og sýnir fallegar hreyfingar og virðist vera efni í flottan hest.

Athugið

Glymur frá Leiðólfsstöðum verður til afnota fyrir hryssur meðlima Limsfélagsins.
Stefnumótastaður Faxaból í Reykjavík til mánaðarmóta maí-júní 2011.
Nánari uppplýsingar í s:698 8370
Eftir Landsmót verður girðingahald gæðingsins á Torfastöðim í Biskupstungum.
Tekið verður á móti hryssum þriðjudagskvöldið 5. júlí á milli kl. 20:00 - 21:00 Borga verður girðingargjaldið um leið og sleppt er í girðingu kr. 20.000 (í peningum).

 

Þetta er mynd af fyrsta en klárlega ekki síðasta verðlaunagrip sem Glymur Limur fékk á kynbótasýningunni í Víðidal. Glymur er með næst hæsta dóm sem stóðhestur í 5 vetra flokki á Íslandi í dag og farseðillinn á landsmótið verður innrammaður. Við viljum hvetja alla eigendur til að kaupa miða á landsmótið og nú þegar er búið að setja á laggirnar undirbúningsnefnd sem á að að sjá um skemmtiatriði á landsmótinu þegar Glymur Limur tekur við verðlaununum sínum.  Jibbbbýý húrra.
Verðlaunin verða til að byrja með geymd á náttborðinu hjá Helga þangað til búið verður að smíða verðlaunaskápinn og kannski þurfum við að smíða sérstakt hús eins og Diddi undir allt verðlaunasafnið.

Já sælllll
Sýningin hjá Sigga Matt og Glym tókst glæsilega og endaði klárinn í 8,24 í aðaleinkunn. Til hamingju allir aðdáendur klársins.

Aðaleinkunn: 8,24

Sköpulag: 8,28	Kostir: 8,21
Höfuð: 8,0    8) Vel opin augu   Háls/herðar/bógar: 8,5    1) Reistur   5) Mjúkur   7) Háar herðar   F) Fyllt kverk   Bak og lend: 9,0    2) Breitt bak   3) Vöðvafyllt bak   8) Góð baklína   Samræmi: 8,5 Fótagerð: 8,0    4) Öflugar sinar   Réttleiki: 8,0 Hófar: 8,0    3) Efnisþykkir   8) Vel formaðir   I) Slútandi hælar   Prúðleiki: 7,5	Tölt: 8,5    2) Taktgott   3) Há fótlyfta   Brokk: 8,5    1) Rúmt   4) Skrefmikið   Skeið: 7,0    C) Fjórtaktað   Stökk: 8,0    5) Takthreint   Vilji og geðslag: 8,5    2) Ásækni   4) Þjálni   Fegurð í reið: 8,5    4) Mikill fótaburður   Fet: 8,5    3) Skrefmikið   Hægt tölt: 8,5 Hægt stökk: 8,5

Glymur Limur í byggingadóm.

Vorið er komið og grundirnar gróa og Glymur er kominn í dóm. Herdís, Jón og Gústi kynbótadómarar þurftu að setja upp sólgleraugun þegar stórstjarnan kom í salinn í kynbótadóm. Á hliðarlínunni voru Helgi, Dabbi Matt og Raggi Tomm og sperrrtu eyrun er dómarnir létu stóru tölurnar falla (vonandi niður á blaðið líka).
Glymur Limur er í feikna standi og ef allt gengur upp þá munum við eiga einn umtalaðasta stóðhesta landsins í kvöld. En ef það gengur ekki vel þá er það að sjálfssögðu dómurunum að kenna eða kuldanum því eins og allir karlmenn vita þá eru Limir ekki mikið fyrir að sýna sig í miklum kulda.

Fyrsta snjómót Limsfélagsins var haldið laguardaginn 12. mars. Ekki kom það neinum á óvart að Limur frá Leiðólfsstöðum átti glæsilega sýningu og rúllaði upp mótinu með glæsibrag. Góð byrjun á keppnisferli þessa glæsilega fola enda bárust tilboð í hann strax að móti loknu. (sjá fleiri myndir frá snjómótinu í myndaalbúmi)

Hátíð í bæ og Limurinn skrapp í bæjarferð. Tókum nokkrar myndir af kappanum (sjá fleiri myndir í myndaalbúmi)